Ölkə vətəndaşlarının növbəti pulsuz tibbi müayinə aksiyasına start verilib
Azərbaycan Respublikasının Prezidenti cənab İlham Əliyevin ölkə vətəndaşlarının növbəti dəfə pulsuz tibbi müayinədən keçirilməsi barədə tapşırığının icrası ilə əlaqədar Ağstafa rayon əhalisinin tibbi müayinədən keçirilməsinə başlanılmışdır.
Belə ki, aksiyanın ilk günlərində Köçəsgər, Dağ Kəsəmən və Muğanlı kəndlərinin, həmçinin Ağstafa rayon sakinlərinin bir qismi tibbi müayinədən keçirilmişdir. Tibbi müayinədə səyyar həkim briqadası ilə birgə Ağstafa rayon İcra hakimiyyətinin məsul işçiləri də iştirak etmişdir.
Azərbaycan dövlətinin sosial yönümlü siyasətinə uyğun olaraq ölkədə səhiyyənin inkişafı və əhalinin sağlamlığının qorunması üzrə görülən işlərin əsas məqsədi əhaliyə zəmanətli tibbi xidmət göstərilməsi və xəstəliklərin profilaktikası yolu ilə əhalinin sağlamlıq vəziyyətinin yaxşılaşdırılmasıdır. Əhalinin reproduktiv sağlamlığının qorunması dövlətin sosial siyasətinin ən vacib sahələrindən biridir. Məhz bu məqsədlə Azərbaycan Respublikasının Prezidenti cənab İlham Əliyev ölkə vətəndaşlarının tibbi müayinədən keçirilməsi barədə tapşırıq vermişdir.
