Ağstafa rayon doğum evi açılışa hazırlanır

Ağstafa Rayon Mərkəzi Xəstəxanasının Doğum şöbəsinin inzibati binasında aparılan əsaslı yenidən qurma işlərindən sonra istifadəyə verilmək üzrədir.  20 çarpayılıq doğum evinin inzibati binası ən müasir texnologiyaya əsaslanan səhiyyə avadanlıqları  və cihazları ilə təchiz olunur. Burada ümumi havalandırma, mərkəzləşdirilmiş oksigen qazı sistemi quraşdırılmışdır ki, bunun da köməyi ilə istənilən vaxt  hər bir otağı intensiv terapiya palatasına çevirmək mümkün olacaqdır. Eyni zamanda cərrahiyyə, anesteziologiya və reanimasiya şöbələri də fəaliyyət göstərəcəkdir. Cərrahiyyə otaqları elektron idarə olunan stollarla, narkoz aparatları ilə, eləcə də reanimasiya şöbəsi yüksək standartlara cavab verən süni tənəffüs aparatları və xəstəyə təcili yardım göstərmək üçün müvafiq cihazlarla təchiz ediləcəkdir.   Tibb ocağında yeni doğulmuşların reanimasiya şöbəsi, intensiv terapiya palatası da yaradılmışdır. Həmçinin, burada fəaliyyət göstərəcək  laboratoriyalarda da ən son texnoloji avadanlıqlar quraşdırılır.
Binanın ətrafı  abadlaşdırılıb, həyətinə dekorativ daşlar döşənib,  yaşıllıq sahələrinə müxtəlif ağac və gül-çiçək kolları əkilib, müasir işıqlandırma sistemi quraşdırılıb, müvafiq yerlərə istirahət skamyaları qoyulubdur.
Bu gün Ağstafa rayon İcra hakimiyyətinin başçısı Məhərrəm Quliyev rayonun bir sıra məsul işçiləri ilə birlikdə növbəti dəfə burada aparılan işlərlə yaxından tanış oldu, müvafiq tapşırıqlarını verdi.