Ağstafa gənclərinin hərbi xidmətə yola salınması təntənə ilə qeyd edildi

“Azərbaycan Respublikası vətəndaşlarının 2018-ci il oktyabrın 1-dən 30-dək müddətli həqiqi hərbi xidmətə çağırılması və müddətli həqiqi hərbi xidmət hərbi qulluqçularının ehtiyata buraxılması haqqında” Azərbaycan Respublikası Prezidentinin Sərəncamının icrası ilə bağlı Ağstafa rayonunda gənclərin hərbi xidmətə yola salınması münasibəti ilə geniş tədbir keçirildi. Belə ki tədbirdə Ağstafa rayon İcra hakimiyyətinin başçısı cənab Məhərrəm Quliyevin iştirakı ilə rayon İcra hakimiyyəti başçısının müavinləri, şöbə müdirləri, rayon hüquq-mühafizə orqanlarının rəhbərləri, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəhbərliyi və zabitləri, Böyük Vətən müharibəsi veteranları, rayon ağsaqqalları və Qarabağ müharibəsi əlliləri, yerli icra nümayəndələri,  bələdiyyə sədrləri, çağırışçı gənclər və rayon ictimaiyyətinin nümayəndələri iştirak etdi. Tədbir iştirakçıları ilk öncə Ümummilli lider Heydər Əliyevin abidəsini ziyarət etdilər, abidənin önünə gül dəstləri qoydular, Ulu öndərə hörmət və ehtiramlarını bildirdilər.
Ağstafa rayon İcra hakimiyyətinin başçısı Məhərrəm Quliyev  çıxış edərək hərbi xidmətə yola salınan gəncləri təbrik etdi. Onları Vətənin müdafiəsi kimi müqəddəs işdə ayıq sayıq olmağa çağırdı, hərbi nizamnamələrin və komandirlərin tələblərinə əməl etməyi, ölkəmizin ərazi bütövlüyünü möhkəm qorumağı, hərb işinin sirlərinə mükəmməl yiyələnməyi tövsiyə etdi. Azərbaycan ordusunun yaranma tarixindən, ölkə başçısı cənab İlham Əliyevin Silahlı Qüvvələrimizin daha da inkişaf etdirilməsi, möhkəmləndirilməsi istiqamətində gördüyü böyük işlərdən danışdı. Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəis Füzuli Əliyev məruzə edərək bildirdi ki, cənab Prezidentin Sərəncamına uyğun olaraq vətəndaşların həqiqi hərbi xidmətə çağırışı  ilə əlaqədar təşkilati tədbirlər həyat keçirilir, çağırışçıların hər biri artıq hansı hərbi hissədə qulluq keçəcəklərini qabaqcadan bilirlər. Yola salınan gənclərə tövsiyələrini bildirərək onlara uğurlu xidmət arzuladı. Daha Sonra hərbi xidmətə yola düşən gənclərin valideynləri çıxış edərək, övladlarının hərbi xidmətə yola düşmələrindən qürur duyduqlarını və onlara vətənin layiqli əsgərləri olmalarını tövsiyə etdilər.
Sonda çağırışçılar müqəddəs Quran kitabının altından keçərək dövlət bayrağını öpüb hərbi hissələrə yola salındı.