"Qardaşlaşmış məktəblər" layihəsi çərçivəsində tədbir keçirildi

Azərbaycan Respublikasının Prezidenti Yanında  Bilik Fondunun "Qardaşlaşmış məktəblər"  layihəsi  çərçivəsində ilk tədbir  Ağstafa şəhəri  1 saylı  və  Bakı şəhəri  Nizami rayonu  E.Quliyev adına 145 saylı tam orta məktəblərinin iştirakı ilə keçirildi. Layihənin əsas  məqsədi  iki məktəb arasında dostluq, qardaşlıq əlaqələri yaratmaqdan, eləcə də regionlarda həyata keçirilən  irimiqyaslı infrastruktur layihələr, sürətli abadlıq, tikinti-quruculuq işləri ilə yaxından tanış olmaqdan ibarətdir.
Məktəblilər ilk öncə Ağstafa rayonu Heydər Əliyev Mərkəzində  Azərbaycan xalqının ümummilli lideri Heydər Əliyevin abidəsini ziyarət edərək abidə önünə  gül dəstələri qoydular.
Daha sonra  Ağstafa  şəhəri 1 saylı  tam orta məktəbində  iki məktəbin  “Qardaşlaşma Sazişi”  imzalandı. Hər iki məktəb bir-birlərinə məktəblərini təmsil edən rəmzi  hədiyyələri  təqdim etdilər.
Ağstafa məktəbliləri rayonumuzu təmsil edən hədiyyələrlə qonaqları salamladılar.  Məktəbdə intellektual yarış təşkil edildi. Maraqlı və gərgin bilik mübarizəsi şəraitində keçən yarışda Ağstafa şəhər 1 saylı tam orta məktəbin komandası qələbə qazandı.
Yarış iştirakçılarına Bilik Fondu tərəfindən təsis edilmiş müvafiq kubok və  qiymətli hədiyyələr təqdim edildi.
Növbəti  gündə  Bakı şəhəri  145 saylı məktəbin  numayəndələrinin  rayonumuzun tarixi və görməli yerlərinə ekskursiyası nəzərdə tutulmuşdur.