2 Fevral Gənclər Günü qeyd olundu
2 Fevral Gənclər Günü münasibəti ilə Ağstafa rayon Heydər Əliyev Muzey-Mərkəzində geniş tədbir keçirildi. Tədbirdən öncə rayon gəncləri Azərbaycan xalqının ümummilli lideri Heydər Əliyevin abidəsini ziyarət edərək abidə önünə gül-çiçək dəstələri qoydular.
Sonra tədbirin reqlamentinə uyğun olaraq Heydər Əliyev Muzey-Mərkəzinə ekskursiya təşkil olundu, rayonun istedadlı gənclərinin əl işlərindən ibarət təşkil olunmuş sərgiyə baxış keçirildi.
Tədbiri giriş sözü ilə Ağstafa rayonu İcra hakimiyyəti başçısının müavini Lalə Eyyubova açaraq bu münasibətlə gəncləri təbrik etdi. Qeyd olundu ki, bu gün 1996-cı ildə ulu öndərimiz Heydər Əliyevin müvafiq Sərəncamı ilə təsdiq olunmuşdur. Gənclər günü MDB məkanında və Şərqi Avropa ölkələri arasında ilk dəfə olaraq Azərbaycanda qeyd olunub. Azərbaycanda əsası ulu öndər Heydər Əliyev tərəfindən qoyulan dövlət gənclər siyasəti mövcuddur və indi həmin siyasət bu gün Azərbaycan Respublikasının Prezidenti cənab İlham Əliyev tərəfindən uğurla davam etdirilir. Gənclərin mənəvi inkişafı, vətənpərvərlik tərbiyəsi, xarici ölkələrdə təhsili, sosial müdafiəyə ehtiyacı olanların problemlərinin həlli istiqamətində görülən işlər, gənclər təşkilatlarının formalaşması və inkişafı üçün yaradılan şərait və imkan böyük diqqətin nəticəsidir.
Sonra Rayon Gənclər və İdman İdarəsinin rəisi Feyruz Həsənov 2014-cü il ərzində rayonda gənclər və idman sahəsində görülmüş işlər barədə geniş məruzə ilə çıxış etdi. Tədbirdə çıxış edən rayonun aktiv gəncləri qeyd etdilər ki, Ulu Öndərin gənclərə etimadı indi öz təsdiqini tapmaqdadır. Cənab Prezidentimiz İlham Əliyevin həyata keçirdiyi gənclər siyasəti nəticəsində Azərbaycan gənci yüksək intellektual səviyyəsi və geniş dünya görüşünə görə dünya gəncləri sırasında ilk yerlərdə gedir.
Tədbirdə rayonun ictimai-mədəni həyatında fərqlənən və müxtəlif sahələrdə 2014-cü il ərzində yüksək naliyyətlər əldə etmiş yeniyetmə və gənclər müvafiq “Fəxri Fərman” və hədiyyələrə təltif olundular.
Tədbir çay süfrəsi ətrafında bədii-əyləncəli konsert proqramı ilə davam etdirildi.
