Gül bayramı və “Bakı-2015” ilk Avropa Oyunlarına hazırlıq işləri həyata keçirilir

Azərbaycan xalqının ümummilli lideri Heydər Əliyevin anadan olmasının 92-ci ildönümü ilə əlaqədar Gül bayramına və “Bakı-2015” ilk Avropa Oyunlarının məşəl qarşılama mərasiminə hazırlıq işləri sürətlə davam etdirilir.
Artıq bir neçə gündür ki, Ağstafa şəhəri Heydər Əliyev adına mədəniyyət və istirahət parkı  və Tarixi və Müasir abidələr parkında yeni gül kollarının əkilməsi, gül dəstlərindən ibarət milli bəzək nümunələrinin yaradılması işləri aparılır. Bir neçə gün ərzində 12 minə qədər yeni gül kolları əkilmiş, buta, romb və digər formalarda güllərdən mozaika tərtib olunmuşdur. Cari ildə Gül bayramının daha möhtəşəm və rəngarəng keçməsi üçün müvafiq bayram proqramı hazırlanmışdır.
Ağstafa şəhəri bu günlərdə daha bir beynəlxalq tədbirin iştirakçılarını qəbul etməyə hazırlaşır. 18 may 2015-ci il tarixdə Ağstafada  “Bakı-2015” ilk Avropa Oyunlarının məşəlinin qarşılanma mərasimi olacaqdır. Məşəli qarşılama mərasiminə hazırlıq işləri çərçivəsində rayon mərkəzində məşəlin keçəcəyi küçələrdə  təmir və abadlıq işlərinə başlanılmışdır. Şəhərin Heydər Əliyev prospektində, N.Nərimanov, S.Ağamalıoğlu, R.Alıcanov, M.Ə.Rəsulzadə, 20 yanvar küçələrində hasarların, dekorativ  taxta qapı və məhəcərlərin rənglənməsi və cari təmir işləri aparılır.
Bayramlar ərəfəsində aparılan işlərin sürətlə və keyfiyyətlə görülməsinə nəzarət olunur.