Ağstafa rayonunun Mədəniyyət, Musiqi və İncəsənət Mərkəzlərinin tikintisi başa çatır

Azərbaycan Respublikasının Prezidenti cənab İlham Əliyevin 30 iyun 2014-cü il tarixli  “Ağstafa rayonunun sosial-iqtisadi inkişafının sürətləndirilməsinə dair əlavə tədbirlər haqqında”  Sərəncamı ilə Ağstafa şəhərində inşasına başlanılan Musiqi və İncəsənət Mərkəzinin tikintisində işlər sürətlə davam etdirilir. Qısa zaman ərzində inşaatçılar tərəfindən binanın tikintisində xeyli işlər görülmüş və binanın dam örtüyünün qoyulması  başa çatdırılmışdır. Hazırda Mərkəzdə tikinti-quraşdırma işlərinin yeni mərhələsinə başlanılmışdır. Belə ki, binaya üzlük materiallarının quraşdırılması və daxildə tamamlama işlərinin aparılması işi sürətləndirilmişdir. Mərkəzin ara divarlarının hörgüsü və suvaq aparılması tamamlanmış, rənglənmə işlərinə başlanılmış, layihə üzrə nəzərdə tutulan işlərin sürətlə aparılması təmin edilir. Binanın ətrafında genişmiqyaslı abadlıq işlərinə başlanılmışdır.
Azərbaycan Respublikasının Prezidenti cənab İlham Əliyevin 30 iyun 2014-cü il tarixli Sərəncamına uyğun olaraq Ağstafa rayon Mədəniyyət Evində aparılan əsaslı təmir və yenidənqurma işləri yekunlaşdırılmışdır. Ağstafa rayon Mədəniyyət Mərkəzinin əsaslı təmir işləri çərçivəsində binanın əsas zal və inzibati otaqlarının yenidən qurulması başa çatdırılmış, müasir dekorasiya, yumşaq mebel inventarları ilə təmin edilmiş, ən son tələblərə cavab verən mərkəzi istilik və ventilyasiya sistemi, müasir akustika, səs gücləndirici və səhnə işıqlandırılması avadanlıqları  quraşdırılmışdır. Binanın fasad və yan hissələrinə dekorativ üzlük  daşlar vurulmuş, fasad hissəsində daşlardan oyma şəbəkə və xüsusi gecə işıqlandırılması sistemi quraşdırılmışdır. Bu da mərkəzin  xarici görünüşündə müasir və milli ornamentlərin  sintezini təşkil etməklə xüsusi gözəllik verir.  Binanın yanında yeni xiyaban salınmış, səki daşı düzülmüş və gecə işıqlandırılması təmin edilmişdir. Mədəniyyət Mərkəzinin binasının yerləşdiyi Ağstafa şəhəri Eyvaz Qələmçəli küçəsində də aparılan əsaslı yenidənqurma işləri başa çatmaq üzrədir.