Ağstafa RİH başçısı Seymur Orucov Gürcüstan respublikası ilə həmsərhəd olan Sadıqlı kəndində vətəndaşların növbəti səyyar qəbulunu keçirib
Müvafiq qrafikə uyğun olaraq Sadıqlı kənd tam orta məktəb binasında təşkil olunan vətəndaş qəbulunda rayonun hüquq-mühafizə orqanlarının rəhbərləri, RİH başçısı aparatının məsul şəxsləri, aidiyyəti təşkilatların nümayəndələri və kənd sakinləri iştirak ediblər.
RİH başçısı çıxışında Prezident İlham Əliyevin ölkəmizin tərəqqisi naminə yürütdüyü daxili və xarici siyasətdən, respublikamızın dinamik sosial-iqtisadi inkişafından, hərbi qüdrətindən söz açaraq bildirib ki, hər bir yaşayış məntəqəsini əhatə edən vətəndaşların səyyar qəbullarının təşkili yerlərdə həlli vacib məsələlərin dərindən öyrənilərək operativ həllinə nail olmağa, əhalinin sosial rifah halının yaxşılaşdırılmasına xidmət edir.
Vətəndaşlar tərəfindən qaldırılan məsələlər qeydiyyata alınaraq nəzarətə götürülüb. Hər məsələnin həlli istiqamətində aidiyyəti üzrə məsul şəxslərə müvafiq tövsiyə və konkret tapşırıqlar verilib.
