Ağstafada yazın birinci ayında ilk səyyar qəbul Dağ Kəsəmən kəndində keçirilib
Ağstafa RİH başçısı Seymur Orucov ölkə rəhbərliyinin müvafiq tapşırıq və tövsiyələrinə uyğun olaraq rayonun şəhər, qəsəbə və kəndlərində vətəndaşların səyyar qəbullarını davam etdirir. Müvafiq qrafikə uyğun olaraq Dağ Kəsəmən kənd 1 nömrəli tam orta məktəb binasında təşkil olunan növbəti səyyar qəbulda rayonun hüquq-mühafizə strukturlarının rəhbərləri, aidiyyəti idarə, müəssisə və təşkilatları təmsil edən məsul şəxslər, eləcə də yerli ictimaiyyətin nümayəndələri iştirak ediblər.
Səyyar qəbulda giriş nitqi söyləyən RİH başçısı qeyd edib ki, Ulu Öndər Heydər Əliyevin müdrik və uzaqgörən siyasi xətti ilə ölkəmizi dinamik inkişaf yolunda daim irəli aparan və xalqımıza tarixi Zəfərlər bəxş edən Prezident İlham Əliyevin qətiyyətli siyasətinin mərkəzində vətəndaşların rifahının təminatı, onların qayğıları və təhlükəsizliyi dayanır. Sosial sahəyə daim xüsusi diqqət göstərilir, sosial müdafiə sisteminin gücləndirilməsi istiqamətində ardıcıl olaraq mühüm addımlar atılır.
Səyyar qəbulda sakinlər tərəfindən qaldırılan məsələlərin qanunvericiliyin tələblərinə uyğun həll edilməsi, eləcə də yerli icra hakimiyyətinin səlahiyyətlərinə aid olmayan müraciətlərin aidiyyəti qurumlara çatdırılması istiqamətində müvafiq tapşırıqlar verilib.
