Şriftin ölçüsü :

Saytın rəngi :

Meyvə bağlarına və əkinlərə dəyən zərər üzrə rekord məbləğdə aqrar sığorta ödənişi edilib

03 dekabr 2024 | 15:50

Azərbaycanda dövlət dəstəyi ilə təqdim edilən aqrar sığorta çərçivəsində meyvə bağları və sair əkinlər üzrə böyük məbləğdə ödənişlər həyata keçirilib.

Aqrar Sığorta Fondu tərəfindən ödənişlər Ağstafa və Samux rayonlarında yerləşən və müxtəlif hadisələr nəticəsində zərər çəkən fermer və təsərrüfatlara edilib.

Sığorta ödənişləri fırtına, dolu, sel-subasma və sair hadisələrdən dəymiş zərərlər üzrə olub.

Ağstafa rayonun Poylu qəsəbəsində yerləşən “Kur Fruit Company” MMC şirkətinin gilas, alma, armud və şaftalı bağlarına fırtına nəticəsində böyük zərər dəyib. Aqrar Sığorta Fonduna bu barədə məlumat verildikdən sonra təsərrüfata ezam edilən ekspertlər hadisəni araşdırıb, zərəri qiymətləndirib, nəticədə meyvə bağlarına dəymiş zərər üzrə 214 170 manat ödəniş həyata keçirilib. Bu indiyədək Azərbaycanda meyvə bağlarına dəymiş zərər üzrə ödənilmiş ən böyük məbləğdir.

Samux rayonunun Qarabaclı kəndində yerləşən qarpız, günəbaxan və arpa sahələri isə subasmadan zərər çəkib. Hadisənin araşdırılmasından sonra Aqrar Sığorta Fondu tərəfindən təsərrüfata qarpız sahəsi üzrə 94 500 manat, arpa sahəsi üzrə 24 500 manat, günəbaxan sahəsi üzrə isə 39 600 manat zərər hesablanaraq fermerlərə ödənilib. Qarpız və günəbaxan üzrə ödənişlər indiyədək bu bitkilər üzrə ən yüksək sığorta məbləğləridir.

Samux rayonunun Qarayeri kəndində isə gilas, şaftalı, gavalı bağları bu ilin may ayında fırtına hadisəsindən ciddi zərər görüb. Bu hadisə nəticəsində meyvə bağına dəyən zərərlər üzrə 25 049 manat aqrar sığorta ödənişi edilib.

Aqrar Sığorta Fondu tərəfindən Ağstafa və Samux rayonlarında təbiət hadisələrindən zərər çəkən fermerlərə sığorta ödənişi tədbiri keçirilib. Aqrar Sığorta Fondunun məsul şəxslərinin, fondun Şəmkir və Goranboy filiallarının əməkdaşlarının, Samux rayon icra hakimiyyətinin rəhbər şəxslərinin və DAİM rəhbərlərinin iştirak etdiyi tədbirlərdə aqrar sığorta mexanizmi haqqında geniş məlumat verilib, təbiət hadisələrindən zərər çəkmiş fermerlərə ödənişlər təqdim edilib.

Qeyd olunub ki, 2024-cü ildə müşahidə olunan qeyri-sabit hava şəraiti və çoxsaylı təbiət hadisələri nəticəsində respublikanın bölgələrində təsərrüfatlara və əkin sahələrinə zərər dəyib, əkinləri su basıb. Bu hadisələr nəticəsində ən çox zərər görən təsərrüfatlardan biri də Ağstafa və Samux rayonlarında yerləşən təsərrüfatlardır.

Aqrar Sığorta Fondu bu ilin ilk 9 ayında fermerlərə 3,8 milyon manat sığorta ödənişi həyata keçirib, ilin sonunadək bu məbləğin 6 milyon manatı keçəcəyi gözlənilir. Ümumilikdə isə indiyədək Aqrar Sığorta Fondu tərəfindən fermerlərə 10 milyondan artıq sığorta ödənişi edilib. 

Daha sonra təsərrüfatları təbiət hadisələrindən zərər çəkmiş fermerlərə sığorta ödənişləri təqdim edilib. Ödəniş alan fermer və təsərrüfat rəhbərləri sığorta ödənişinin onlara böyük dəstək olduğunu, aqrar sığorta mexanizminin işindən razı qaldıqlarını bildiriblər.

Xatırladaq ki, hazırda Aqrar Sığorta Fondu 48 bitki məhsulunu sığortalamağa imkan verir, buraya taxıl və texniki bitkilər, bostan bitkiləri və meyvə bağları aiddir. Aqrar Sığorta Fondu ölkədə əkilən demək olar ki, bütün meyvə bitkilərini sığortalayır.

Aqrar sığortanın əhatə etdiyi məhsullar və risklər, eləcə də sığorta haqları barədə ətraflı məlumatı  Aqrar Sığorta Fondunun www.asf.gov.az rəsmi internet səhifəsindən və səhifədəki “Bitkiçilik sığortası kalkulyatoru” vasitəsilə əldə etmək mümkündür. Fermerlər həmçinin Fondun 1651 Çağrı Mərkəzinə zəng etməklə, aqrar sığorta barədə məlumat ala, təsərrüfatlarını sığortalaya bilərlər.

Keçidlər